2011-ci ilin yanvar-aprel aylarında ticarətin bütün növlərinin şəbəkəsi vasitəsilə əhaliyə 2493,8 milyon manatlıq, yaxud əvvəlki ilin eyni dövrünün səviyyəsindən 3,8 faiz çox müxtəlif çeşidli istehlak malları satılmışdır. Malların 18,5 faizi hüquqi şəxslər, 81,5 faizi hüquqi şəxs yaratmadan fəaliyyət göstərən fərdi sahibkarlar tərəfindən realizə olunmuşdur. Əhali istehlak mallarının 461,5 milyon manatlığını hüquqi şəxslərdən, 2032,3 milyon manatlığını fərdi sahibkarlardan almışdır. 2010-cu ilin eyni dövrü ilə müqayisədə hüquqi şəxslər üzrə pərakəndə əmtəə dövriyyəsi 19,1 faiz, hüquqi şəxs yaratmadan fəaliyyət göstərən sahibkarlar üzrə isə 0,8 faiz artmışdır. Əhaliyə satılmış malların 1313,1 milyon manatını ərzaq, 1180,7 milyon manatını isə qeyri-ərzaq malları təşkil etmiş və onların xüsusi çəkiləri müvafiq olaraq 52,6 və 47,4 faiz təşkil etmişdir. 2011-ci ilin yanvar-aprel aylarında əhaliyə 980,1 milyon manatlıq və ya 2010-cu ilin müvafiq dövrünün səviyyəsindən 5,0 faiz çox pullu xidmətlər göstərilmişdir. Xidmətlərin 57,1 faizi hüquqi şəxslərin payına düşmüş və onlar tərəfindən əhaliyə 560,0 milyon manatlıq və ya əvvəlki ilin müvafiq dövründən 0,5 faiz çox xidmətlər göstərilmişdir. Fiziki şəxslər tərəfindən göstərilən pullu xidmətlərin həcmi 11,7 faiz artaraq 420,1 milyon manata çatmışdır.